| Ngadep Pak Polisi | ||||
|
|
Ngadep Pak Polisi Cerpen A.Kohar Ibrahim OBROLAN kangenan keluarga pada hari Minggu kemaren memang belum tuntas. Sehabis klar bikin jadwal silaturahmi pada sanak keluarga yang bakal dianter ama Mat Jonet dengan motor Suzukinya, obrolan terus ngeloyor ke soal-soal lain. Istimewa sekali soal yang nyangkut heboh kepolisian. Nyoalin pakpol alias pak polisi – gara-gara “celengan gendut” itu, bikin perasaan runyam. “Masak iya sih, cuman pak pol aje nyang dijadiin bahan omongan keluarga kite - kayak bintang pilem barusan dapet gelar pahlawan aje!” bilang gue lewat ponsel pada Mat Jonet. Kalipun omong-omongan itu sembari tawa ngakak campur gemes, tapi rasanya rada pincang, nggak seimbang. “Masih keki, ye?” tanya Mat Jonet ngledek. “Iye, dong – gue emang paling sewot ngedengerin ocehan seenaknye aje,” bales gue ketus. “Mentang-mentang lu anak polisi,” celetuk Mat Jonet cengingisan, nafsu nambahin kayak orang lagi kemaruk: “Anak Pakpol jadul…hehehe!” “Emang iye, dong. Tapi gue tau nggak semuanye polisi jelek. Tapi juga nggak semuanye orang sipil kelakuannye bener,” bales gue, latah kemaruk lekas nambah: “Nyang bukan polisi kayak kite juga banyak nyang salah tapi pura-pura bener.” « Asbun aje, » celetuk lagi Mat Jonet. Gue bayangin die mesem cengingisan, tapi malah ngakak, bilang : « Mentang-mentang lu anak polisi. Buktiin, dong. » « Iye, nanti deh, » bilang gue serius campur becanda : « Gimane kalo sekarang kite ke Situ Gintung, nengok si Buaye Buntung ? Dari sane kite ke Cimanggis… » Lewat ponsel Mat Jonet menjawab setuju penuh semanget, malahan katanya sudah keluar rumah dari Jombang sampai di Kedaung, menuju Ciputat. Betul saja. Begitu ketemu lantas kami menuju Situ Gintung. Sekedar nengok salah satu tempat main-main gue jaman dulu. Situ nyang angker lantaran ada dongengan buaya buntungnya. Tapi setelah setahun lewat situ itu jebol, lantas jadi kering, sampai sekarang sang buaya buntung nggak ditemukan orang. Sesudah potret sana-sini, gue bilang : « Sekarang kite ke Cimanggis, yuk. » Mat Jonet tetep semanget. Nancep motor Suzuki ngeboncengin gue. Kecepetannye nggak kepalang tanggung, bikin gue deg-degan. Selagi jalan macet kayaknya dia biasa sradak-sruduk, tapi lancar-luncur saja ke tempat dituju. Padahal pengendara lainnya ada nyang mentok kepentok kendaraan di depan atawa tembok. Kejadian kecelakaan nyang bukan bikin dia keki tapi malah mesem cengingisan. Sembari komentar: “Rasain deh lu…! Klo belom pinter, latihan dulu nyetir di galengan…!” Gue mesem juga, dalam hati: “Nanti, rasain juga deh -- mesem manis lu jadi mesem asem… ! ” Sewaktu dia tanya, ke Cimanggis nya ke tempat siapa, gue bilang : « Ke rumah Mang Bokar dulu, baru ke tempatnye Mang Ngging. » « Kok ngeduluin Pak Polisi, baru Tentara… » bilang Mat Jonet suaranya kayak orang ngedumel. « Dasar anak polisi… ! » « Iye, dong, » bales gue ngledek. Lantaran sudah janjian lebih dulu, kedatengan kite memang sudah ditunggu-tunggu Mang Bokar bersama bini dan anak-cucunya. Obrolan kangenan berlangsung asyik, ngalor-ngidul, nggak ketinggalan soal “celengan gendut” sampai ke soal polusi sepanjang perjalanan diselang-seling kemacetan dan kecelakaan tabrakan. “Kayaknya pemakai kendaraan motor – istimewa motor makin beguyek, pada belomba duluan nggak mikirin aturan lalulintas,” bilang gue, kayak sengaja mengadu di depan Mang Bokar. “Abisnye zaman ude berubah sih,” tambah Mat Jonet. “Sekarang zaman modern, siapa aje lelaki perempuan bisa gampang punya motor. Asal mao, besok motor dianter ke depan pintu…” “Asal mao bayar kridit, ye?” bilang Mang Bokar. “Gampang punya motor, gampang-gampangan juga nangkringinnye.” “Iye, tuh… Jitu! Nyang dibilang Mang Bokar: gampang punya gampang-gampangan nangkringin motor. Bukan cuman dipake buat duaan atawa ngeboncengin seorang, tapi betiga malahan berempat ame anak-anak! Gile…! ” Ngedenger omongan gue, Mat Jonet diem bungkem, apalgi gue tambah: “Make motor gampang-gampangan aje, jangan-jangan juga nggak punya SIM, mengkali!” Mendadak sontak Mang Bokar mesem ketawa asem, bilang: “Emang gila-gilaan, deh. Aturan nggak dipake, banyak nyang gak punya SIM. Make helm aja pada ogah. Mangkanye sering kecelakaan, ampe sanak-bini babak belur! Klo nggak koit!” Ngedenger omongan kite, Mat Jonet tambah bungkem. Bikin gue tambah berani bilang terus terang: “Mang Bokar, sebetulnye kedatengan kite nih bukan cuman kangenan, tapi tujuannye mengadep Pak Polisi. Lapor, deh. Gini: dari selidikan kite, Mat Jonet sering nglanggar aturan: buktinye punya motor tapi gak punya SIM selaen juga ogah make helm. Ane juga jadi ikut-ikutan nggak make helm…” Sebentar lamanye semua bungkem. Lantas tawa meledak ngakak. Di duluin Mang Bokar, bilang : “Wah! Wah! Klo Mamang masih aktip dan ini di kantor polisi, cepet dibikin proses-verbal, deh!” Lantas dia ngasih nasihat, supaya semuanye sadar jalanin aturan yang ada. Dan kite manggut-manggut, pamit dengan perasaan lega. Sekalipun si Mat Jonet kelihatan mesem-mesem asem, mengkali bathinnye ngedumel: « Dasar anak polisi, lu ! » *** Catatan : Biodata A.Kohar Ibrahim: http://16j42.multiply.com/journal/item/517/ Kumpulan Tulisan: http://16j42.multiply.com/journal/item/494/
3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."
|
|||||||||||||||||||||||||||||||||||||||||||||||||||||||||||||||||||||
